Manifestapena Osasungintza publikoa indartu (bideoa, argazkiak eta azken komunikatua)
Egun, Osakidetzaren narriadura eta murrizketak gero eta larriagoak dira auzo eta herri bakoitzeko osasun-zentroetan, eta are larriagoak, landa-eremuetan.
(PAC)en itxierak, osasun-zentroetako arreta-ordutegien murrizketak, soilik erizainekin medikurik gabe atenditutako osasun zentroak, amaigabeko itxoinaldiak telefonoz hitzordua hartzeko, aurrez aurreko arreta lortzeko zailtasunak, eta lehen mailako arretaren kolapsoaren ondorioz, ospitale-larrialdi saturatuak.
Espezialista batengana iristeko itxaron-zerrendak eta ebakuntza kirurgikoa egiteko epe onartezinak, lehen mailako arretako osasun-langileen etengabeko ordezkapenak; gure hizkuntz-eskubideak behin eta berriz urratuak izaten dira, eta abar luze bat.
Osakidetzaren murrizketak eta desegite progresibo eta programatuak nahita bilatzen du Osasun Publikoaren argaltzea, Osasun Pribatua gizentzeko, kliniken, mutualitateen, aseguru-etxeen, inbertsio-fondoen eta aholkularitza pribatuen interesak bultzatzeko. Gure osasunaren kontura ari dira, eta ondorioak pairatzen ari gara; osasun-eskubidea galtzea dakarte, guztion oinarrizko eskubide gisa.
Joan den astelehenean aurkeztu zen 2023-2025 Osakidetzarako plan estrategikoa, aldaketa kultural baten beharrari buelta emateko eta arduradun politikoek eta Osakidetzako kudeatzaileek ezarritako ibilbide-orriari bultzada berri bat emateko, Osasun Publikoa apurka-apurka eta era programatuan desegiteko. Arreta humanizatzea proposatzen du, baina, modu birtualean, geroratuta eta langile gutxiagorekin.
Digitalizazioaren ezarpenak eta teknologia berrien erabilerak ez dute irisgarritasuna hobetzen, arrakala digitala handitu egin da, eta zailtasun gehigarri bat eragiten die pertsona askori osasun-arreta eskuratzeko orduan; bereziki, egoera ahulenetan dauden pertsonei, osasun-eskubidea ukatuz.
Sailburuaren plan estrategikoa publizitate-panel huts bat baino ez da, zehaztasunik gabekoa, eta ez du neurri zehatzik hartzen gauden larrialdi-egoeratik ateratzeko.
Propaganda-plan merke bat, hitzekin jolasteko, haien esanahia bihurrituz. Iraunkortasunaz hitz egiten dutenean, murrizketaz ari dira, herritarren parte-hartzeaz hitz egiten dutenean, benetan esaten dutena da herritarrak bakarrik sendatzea, enplegua sortzeaz hitz egiten dutenean, enplegu publikoa suntsitzeaz ari dira, enpresa pribatuetan enplegu prekarioak sortzeko; hobekuntza teknologikoez hitz egiten dutenean, arreta prekarioaz hitz egiten dute, eta arrakala digitala handitzeaz.
Eta jakina, ez duela argitzen kalitatezko enpleguak sortuko dituen edo, aitzitik, enpresa pribatuek beren langileak modu prekarioan tratatzea eta Eusko Jaurlaritzak erantzukizunetik salbuestea ahalbidetuko duen.
Gaur, hemen gaude sailburuari, arduradun politikoei, Osakidetzako kudeatzaileei eta Eusko Jaurlaritzari gogorarazteko Osakidetza ez dela berea. Osakidetza enpresa publikoa dela, herritarrena, eta herritarrek, osasun-arloko profesionalekin batera, erabaki beharko lukete kudeaketa, nahi dugun Osakidetzaren ereduari buruz, zer behar dugun. ez gaituzte engainiatzen propagandarekin. Osakidetza berri bat eraiki nahi dugu, guztion elkarlanean eraikia.
Saltzen ziguten Osakidetza hori irudipen hutsa zen. Ilusio optiko bat, osasun pribatizatu, azpikontratatu eta prekarioaren ereduan aurrera egiteko irudipena, kapitalaren eta bere negozioen interesen neurrira egituratua.
Eskatzen dugun eta eraiki nahi dugun osasun publikoa benetako parte-hartzea duen eredua da, gardena, hurbilekoa, irisgarria eta egokitua, kalitatezko enplegu publikoa sortu behar duena, plantilla nahikoarekin eta kalitatezko kontratuekin.
Asistentzia-kalitateaz gain, osasunaren prebentzioan eta sustapenean oinarritutako osasun-eredu komunitario baten motorra ere izan behar du, ikuspegi sozialarekin eta genero-ikuspegiarekin.
Ez dugu onartuko gezurretan jarrai diezaguten eta isilik ikus dezagun zein izango den enpresa pribatuei oparituko dieten Osakidetzaren hurrengo zatia; azken adibidea; Osakidetzaren zentro logistiko baten iragarkia, Durangon.
Zein da honen itzulpena? poltsikoak diru publikoarekin puztea, osasun-sistema publikoa indartzeko eta lehen mailako arreta indartzeko zuzenean bideratu beharko liratekeen guztien aurrekontuen kontura, komunitateko osasun-programak garatzeko eta pertsona guztiek osasunerako sarbide unibertsala izango dutela bermatzeko bideratu beharko liratekeenak, besteak beste.
Gezurretan ari zaizkigu eta, horregatik, Gotzone Sagardui sailburuaren dimisioa eskatzen dugu, bera baita osasun publikoaren narriadura eta utzikeria horren erantzulea. Jasaten.
ditugun egiturazko osasun-arazo larriei aurre egiteko eta konpontzeko gai ez dela erakutsi duelako. Izan ere, gardentasunaz, parte-hartzeaz eta elkarlaneko lanaz hitz egiten digute, eta, aldi berean, Osakidetzak gure herrietako osasun-egoerari buruzko informazioa ukatzen digu, edo gure web-orria blokeatzen du, langileen sarbidea oztopatzeko.
Sailburuaren dimisioa ez da nahikoa, egiturazko aldaketak exijitzen ditugu. Eusko Jaurlaritzari, EAJri eta PSEri murrizketen, desegitearen eta pribatizazioaren politikak geldiarazteko exijitzen diegu.
Asistentzia-kalitatea exijitzen dugu, aurrez aurreko arreta berreskuratzea exijitzen dugu, itxaron-zerrenda onartezinekin amaitzea exijitzen dugu, eta Lehen Mailako Arreta indartzea exijitzen dugu.
Zuekin guztiokin partekatu nahi dugu hau ez dela hemen amaituko,mobilizazio hauek hasiera besterik ez direla, eta gure auzoetan, gure herrietan eta gure hirietan lanean jarraituko dugula murrizketen, desegitearen eta pribatizazioaren aurka.
Horregatik guztiagatik, herri plataformetatik dei egiten dugu bat egitera Osakidetza ehuneko ehun publikoa eraikitzeko. Horrela bakarrik bermatu ahal izango dugulako kalitatezko osasun-arreta duina eta unibertsala jasotzeko eskubidea errealitate bat izatea.
Azkenik, eskerrak eman nahi dizkiegu manifestazioarekin bat egin duten kolektibo eta erakunde sozial, sindikal, auzotar, ekologista eta feministei baita ere pentsiodunen mugimenduari, zuen lankidetzagatik, eta mobilizazio hau aurrera ateratzeko emandako babesagatik. Aurrera!
Osasungintza publikoa defenda dezagun!
Murrizketarik ez!
Pribatizazioari ez!
Osasun publikoa landu eta zaindu!!
Osasun Publikoaren Aldeko Herri Plataformak